هيبتا الحيـــــــاه المتزنه
1-الركن الروحاني
2-الركن الصحي
3-الركن الشخصي
4-الركن العائلي
5-الركن المهني
6-الركن الاجتماعي
7- الركن المادي
------------------------
قبل م نبدأ اي كلام ... ايه بالنسبالك شكل الحياه المتزنه ؟؟ فكرك تبقي عامله ازاي ؟؟ طب انت شايف حياتك كده متزنه وماشيه تمام ؟؟ ولا في كل شويه حجات بتحصل مش تمام ؟؟
طيب جاوب ع نفسك السؤالين دول علشان نخش ف الكلام :)
------------------------
اولا :الركن الروحاني :-
الركن الروحاني دا اهمهم علشان كده هو اول حاجه .. هو اول حاجه علشان هو اكتر حاجه متعلقه بيك .. هو اكتر حاجه جواك حاسسها .. هو اكتر حاجه انت مسيطر عليها .. هي احساسك بكل حاجه انت اكتر واحد عارفها هي ايه
1-الحب .. الحب دا من اهم ما يكون ف الكون .. الحب هو اللي بيخليك عايش .. بيبدأ اول حاجه من حب ربنا سبحانه وتعالي .. حب ربنا دا بيأثر عليك في كل حياتك لانك بتحسه ف كل حاجه بتعملها .. يعني مثلا بتحب ربنا فــ هتحس بالدعاء اللي بتدعيه ويلمس قلبك فــ هتتفائل خير ان ربنا كمان بيحبك فــ هيتقبل الدعاء دا .. غير انك هتلاقي كل اللي حواليك بيحبوك لان لما ربنا بيحب حد بيحبب فيه خلقه ♥فــ هتلاقي الحب دا بقي جزء من حياتك او حياتك كلها .. والحب دا هيبقي حب الرسول .. حب الصالحين .. حب الوالدين .. حب نفسك ..حب نفسك دي ترجعنا تاني لنقطة حب ربنا .. لانك لو مبتحبش نفسك مش هتعمل ولا حاجه م اللي فات دا ^_^
2-حب الناس .. نوع حب الناس دا من اجمل واروع واحسن انواع الحب لانه بيخليك اسهل واروع واكتر راحه .. ودا مستمر ع مدي حياتك :))
عندك مثلا اول ناس بيحبوك من غير مقابل هما الاب والام .. هما اللي بيعملوا كل حاجه من غير ما يطلبوا منك اي مقابل لدا .. انت المفروض تاخد حبهم اللي بيديهولك دا وتقسمه انت ع حياتك .. يعني شويه دراسه شويه احسان شويه حب للي حواليك .. بس طبعا الحب دا مش هنديه لكل الناس بهبل كده .. لالا .. عندنا ف عقلنا حاجتين اسمهم :)
1-العقل التحليلي
2-العقل العاطفي
خلينا نبدأ بالعقل التحليلي : دا بيخليك تستخدم كل حاجه ف وقتها المناسب مع الاشخاص المناسبين .. يعني ايه الكلام دا ؟؟.. يعني بيتعامل مع الناس بالمنطق من خلال كل اللي عملوه معاك .. دا قلبه اسود مبينساش حاجه فيه معلومات عن كل الناس اللي اتعاملت معاهم .. دا مسؤل كمان عن انه ياخد الطاقه من العقل العاطفي ويحولها لمنطق ايجابي علشان يحفزك تحقق اللي نفسك فيه وتوصل لهدفك
اما العقل العاطفي : ف دا اللي بيودينا كلنا ف داهيه .. يعني هو مسؤل عن الردود السريعه .. اي حد يعمل اي حاجه يردهاله بسرعه جدا من غير م يشغل العقل التحليلي خالص ويشوف معلومات اللي بتكلمه دا .. هو مسؤل عن كل حاجه بتحصل بسرعه بس ..الهروب ف المواقف الصعبه مثلا .. الهجوم ف مواقف الهجوم ..لكن هو بطيخه مجوفه مفيهوش اي معلومات عن اي حاجه .. الحسنه الوحيده اللي ف الموضوع دا بقي انه بيدي طاقه للعقل التحليلي علشان يحولها لمنطق ايجابي تحقق بيه اللي نفسك فيه :))
"لا للقرارات السريعه دون التفكير لعدم خسارة الناس"
دايما افتكر للناس الكويس وانسي الوحش .. لان بالفطره انت لو سبت نفسك كده هتلاقي نفسك بتنسي كل حاجه وحشه ومركز مع الحجات الكويسه .. جرب اعملها بس وانسي هتلاقي نفسك استريحت اوي ^^
مثلا: كان في اتنين اخوات ماشيين في صحرا .. ف الاخ الكبير ضرب الاخ الصغير .. راح الاخ الصغير كتب ع الرمله "اخي الكبير ضربني" جم بعد شويه لقوا واحه وفيها ميه .. الاخ الصغير جري ونط ف الميه وكان هيغرق راح جري الاخ الكبير عليه وانقذه .. طلع الاخ الصغير فوق صخره وكتب عليها " اخي الكبير انقذني" سأله الاخ الكبير عملت كده ليه ؟؟ قاله علشان الوحش هيجي شوية هوا وياخدوه معاهم .. اما الكويس لازم يكون محفور وموجود ع طول .. هي دي طبيعة الانسان اصلا :)
3-العطاء الغير مشروط : دا معناه انك تدي اللي قدامك من غير ما تستني منه اي حاجه .. اما لو خليت عطائك مشروط فــ انت بكده بتقلل من قيمة نفسك .. لان الشئ المعنوي اسمي وارفع كتير من انه يتقاس بشئ مادي :))
مثلا : كان في واحد من رواد التنميه البشرية اسمه #جيم دا كان دايماً بيقول احنا بنصنع سعادتنا من اكل عيشنا .. يعني بيصنع سعادته وحياته ومكسبه من العطاء للناس اللي حواليه ♥ هو بشكل عام يعني التنميه البشريه من الحجات التي لا تقدر بثمن ..التنميه البشريه مع الايمان بالله الاتنين مع بعض هيغيروا العالم كله .. انت بتغير حياة حد بشكل كامل بمجرد انك تقنعه بالكلام اللي بتقوله .. ودي اعظم رساله ممكن تقدمها ♥
"السعاده مستمره باستمرار العمل"
العطاء بالمال :العطاء ليه اشكال كتير اوي ..من انواعها العطاء بالمال .. مش لازم يكون معاك مليار جنيه علشان تدي حد محتاج فلوس .. مش شرط خالص ع فكره تكون غني .. طب تعالوا شوفو القصه دي . ودي حقيقيه ع فكره
مثلا :كان في راجل عنده شركات وفروع كتير وعالم تاني .. فجأه بدون اي مقدمات شركاته كلها وقعت والاسهم بقت ف الارض وحسب قانون التفليسه البنك حجز ع كل حاجه بيملكها .. حتي عربيته .. خرج من الشركه وروح بيته بتاكسي ومكنش معاه حتي يدفعله خلي زوجته هي اللي دفعتله .. قعد حكي لزوجته كل اللي حصل .. طبعا اتصدمت وانبته مع انه مش ف ايده حاجه .. وراحت جابتله 1000$ وقالتله هما دول اللي ملكنا دلوقتي .. معندناش اي حاجه غيرهم !! .. الوقت دا كان وقت صلاه .. ف راح المسجد وبعد الصلاه لقي الشيخ بيتكلم انهم اشتروا محطه اذاعيه للمسجد ومحتاجين 1000$ علشان يكملوا يعني .. هو وقف من غير ا تفكير واداله الفلوس اللي معاه .. روح بيته معهوش ولا مليم .. لقي شركه بتتصل بيه بتقوله اننا هنشغلك معاانا بــ 10000$ .
شوفت بقي ازاي ربنا كريم .. شوفت انك لما بتدي فلوس لحد محتاجها ربنا بيعوضك ازاي .. شوفت ربنا قد ايه كريم ومبيظلمش حد .. ربنا بيضاعف الحسنه لعشر امثالها ♥
فكر دايما ان لو حاجه ضاعت منك مين لقاها .. يمكن كان محتاجها اوي .. يمكن مكنش هيعرف ياكل ولا يشرب ولا يكمل حياته .. يمكن كان حد من ولاده هيموت علشان الفلوس اللي ضاعت منك دي جاب بيها دوا .. فكر ف كل دا .. فكر ان لو الحاجه دي فضلت معاك هتأذيك .. فكر دايما فـ #لعله_خير .. ربنا مبيجبش حاجه وحشه ابداً ♥
العطاء بالوقت .. زي م اتفقنا ان العطاء ليه اشكال كتير اوي فوق .. من انواعها بقي العطاء بالوقت .. ازاي بقي ؟ انك ممكن تعلم حد حاجه مش عارفها .. دا عطاء بالوقت .. انك تساعد حد ف حاجه كان لازم يخلصها ف وقت ميعن .. دا عطاء بالوقت .. حتي لو ابتسمت ف وش حد .. فــ دا عطاء بالوقت ♥
العطاء مش بس فلوس او اي شئ مادي .. ممكن العطاء يكون :وقتك-حبك-ابتسامتك--كلامك-نصيحتك-علمك ♥
4-التسامح : قبل م نخش ف التسامح .. اسال نفسك الاول انت لو هتسامح حد هتسامحه ليه ؟؟
عارف بقي انك لو سامحت حد فــ انت بتسامح الاول علشان نفسك !! مش غريبه ولا حاجه .. اه علشان نفسك .. علشان متشيلش الهم والغم جوا قلبك وتفضل حزين ومتضايق .. هتقولي طب وانتي مالك دا نفسي وانا حر فيها .. هرجع اقولك لا .. م انت بتبقي مشحون طاقه سلبيه م الغم دا .. ف تيجي تتعامل معايا تطلع الطاقه دي عليا .. وانا اخدها واتضايق واروح اطلعها ع غيري .. طب وعلي ايه كل دا .. ما تريح نفسك وتسامح وتنسي يا عم ^^
تاني حاجه انت بتسامح علشان "من لا يغفر لا يغفر له " عارف يعني ايه لازم تغفر للناس وتسامحهم علشان ربنا .. سامح لله وبس ♥
و علشان الناس اللي حوليك .. لما تشوفك سامحت فلان الفلاني وعمل فيك كذا .. هتقول دا فلان عمل فيا اقل وانا مسامحتهوش .. لالا اسامحه يعني اللي سامح احسن مني ف ايه ؟؟ دا بجد تفكيرنا ^^ وعلشان شكلك وقوتك قدام نفسك .. انت لما بتسامح حد بتظهر قوتك قدام نفسك .. انه هو مجتلوش الجراءة انه يجي يتأسف .. فــ انت سامحت من غير حاجه .. كفايه شكلك قدام نفسك
واخيرا بقي علشان الاخ اللي هتسامحه .. علشان تحسسه قد ايه هو ضعيف باللي عمله .. علشان تعرفه ان القوه ف الخير مش ف الشر :))
2-الركن الصحي:-
صحتك اكيد هتكون سبب ف ا ان حياتك تبقي ماشيه تمام .. يعني لو الصحه اتدهورت شويه بس .. كل الاركان السته التانيين ضاعوا .. صحتك دي هديه من ربنا .. وطالما هدية ربنا يبقي لازم نحافظ عليها .. ممكن تخلي صحتك باب من ابواب التقرب لربنا سبحانه وتعالي .. ازاي بقي ؟؟ انك تقوله يارب بحافظ ع صحتي علشان هي هديتك .. اجرني بها خيراً ♥
اول حاجه عندنا ف الصحه هي : الحركه .. مش معني الحركه انك تقضي نص اليوم ف الجيم وترجع البيت تشيل التلاجه ف ايدك اليمين والبوتجاز ف الشمال .. لالا خالص مش دي اللي قصدي عليها .. قصدي ع الحركه الطبيعيه .. تنزل تطلع تمشي .. ودا علشان الدوره الدمويه وعلشان انت متحسش بالملل -_-
عندنا بقي نوع تاني من الحركه .. هي الحركه لهدف .. يعني ايه الحركه لهدف .. يعني انا بعمل حركه علشان اوصل لحاجه انا عايزها ف نفسي ... مثلا انت دلوقتي حصلت مشكله عكننت عليك عيشتك .. متضايق اوي .. اول حاجه .. ادخل اوضتك .. اقفل باب الاوضه بالمفتاح ... بالمفتاح هه .. ابدا بقي شغل اي حاجه بتحبها .. ابدا طلع كل الهبل اللي جواك .. تنطيط بقي وفوق الدولاب وانزل تحت السرير .. اعمل كل اللي نفسك فيه .. طلع كل الطاقه السلبيه اللي جواك بالحركه .. بعد م تخلص وتقعد . مش هتفتكر اي حاجه غير الجنان اللي كنت بتعمله من شويه .. مبروك خلصت المشكله ومبقتش متضايق .. لو مش عايز تعمل كده بقي اتكل علي الله واكتأب .. اما هتقتل حد علشان تطلع اللي جواك وف الحاله دي كده هتموت .. اما تكتأب وتعيش ف الاكتئاب .. وف الحاله دي بردوا هتموت :D
ما علينا يعني انت اهتم بصحتك لانها ميزان سعادتك وراحتك.. اهتم بيها لانها رصيدك ف الدنيا علشان تقدر تحقق احلامك بيها ..ومترهقش نفسك زياده عن اللزوم .. اتأنتخ بالمعقول :D
مثلا:كان في رجل اعمال ناجح جدا جدا جدا .. بيشتغل ف اليوم 16:18 ساعه .. وبيدخن 4 علب سجاير .. وبيشرب 14 فنجان قهوه ف اليوم .. في وسط نجاحاته العظيمه دي جه ف يوم وتعب .. راح المستشفي قالوله عندك جلطه .. اتطور الموضوع وبقي شلل ف الجزء الشمال من جسمه .. كل نجاحاته ضاعت .. ولا هيستمتع بأي حاجه منهم .. الصحه لو اتدهورت شويه .. مش هتحس بطعم الدنيا :(
2- التفكير الايجابي : من الحجات اللي بتأثر ع صحتك بشكل كبير جدا لان التفكير سلبي كان او ايجابي فــ هو بينتشر وبيبهت ع كل الافكار اللي حواليه وبيخليهم زيه .. زي العدوي كده .. والتفكير دا بقي بيتحول لتنفيذ والتنفيذ هو عباره عن احاسيس والاحاسيس دي بتتكرر وبتتحول لسلوك .. السلوك دا بيتخرن في مراكز الطاقه عندنا وبيتحول لملف من الملفات العقليه ..
3-انت ونفسك :خلي بالك كويس جدا وانت بتتكلم مع نفسك .. يعني ممكن تبقي قادر تعمل حاجه .. بمجرد ما تقنع نفسك انك مش هتقدر .. خلاص انسي بقي انك تقدر تعملها تاني ولا تفكر حتي تعملها .. دا ليه ؟؟ لانك مش بتتعامل مع نفسك ع انها حد لازم تقنعه بكل حرف بتقوله وتبررله وتفهمه وتشرحله .. علشان هو اللي هيقنعك وقت م تلاقي نفسك محبط ووقعت خلاص .. هو اللي هيقومك تاني ان شاء الله ^^
3-الركن الشخصي:-
الركن دا بينقسم لــ 3 اقسام :
1-الرؤيه الواضحه : يعني ايه رؤيه واضحه .. يعني انت عايز ايه ؟؟؟ حدد هدفك .. حدد اللي انت عايزه
ومفيش ابدا عذر ليك ابدا انك متبقاش عارف اجابة السؤال دا دلوقتي ! هتتحجج بقي وتقول اصل الحياه صعبه .. هو انا فاضي .. ضغوط الشغل او الدراسه .. مشاكل الحياه .. بص ملكش حجه ف انك متعرفش الاجابه
ومفيش ابدا عذر ليك ابدا انك متبقاش عارف اجابة السؤال دا دلوقتي ! هتتحجج بقي وتقول اصل الحياه صعبه .. هو انا فاضي .. ضغوط الشغل او الدراسه .. مشاكل الحياه .. بص ملكش حجه ف انك متعرفش الاجابه
مثلا: ينفع تبقي رايح شغلك وتعدي تحجز تذكره طيران وتسافر؟؟ .. ينفع تسافر وانت مش عارف رايح ع فين ؟؟ طب ينفع تروح اي بلد من غير م تحجز مكان ليك علشان تعيش فيه ؟؟ طيب السفر دا يوم او يومين .. ما بالك بقي بسفر العمر كله .. مش شايفه محتاج خطه ولا ايه ؟؟ لو مش عايز براحتك .. دي حياتك وعيشتك لو محاولتش تعدل منها محدش هيحاول معاك
"ان الله لايغير ما بقوم حتي يغيروا ما بأنفسهم "
2-التحسين المستمر: من الحجات اللي اليابان عايشه بيها هي الجمله دي .. التحسين المستمر .. يعني الفاشل بالنسبالهم اللي انهردا زي امبارح وبكره زي انهردا .. مفيش حاجه جديده .. مفيش اي تقدم ف حياته لا ليه ولا للي حواليه .. ولازم علشان نبقي انهردا احسن من امبارح يبقي عندنا مرونه ف التعامل .. ا لمرونه دي لانك انت ف النهايه المستفاد .. لازم تتحمل :))
3-القراءة قوه :انك تقرأ دا ف حد ذاته رغبه ف التغيير للافضل ..دا دافع جواك انك تبقي احسن من اللي انت فيه .. اقتنع ان بعدد الكتب اللي بتقراها بتزيد خبرتك ف الحياه .. بيزيد عمر كاتب الكتاب علي عمرك انت :)) في احصائيه بتقول ان الانسان اللي بيقرأ 3 كتب في مجال معين فــ بيكون من احسن 5% في العالم في المجال دا :)
4-الركن العائلي:-
الركن العائلي دا بيتكلم عن علاقتك انت بأسرتك وبأهلك بشكل عام
الركن دا من الاركان المؤثره جدا ع باقي الاركان لان المستقر عائليا بيكون مستقر في باقي جوانب الحياه
مثلا: كان في واحد صاحب بنك ف مونتريال دا كان من اكبر 3 بنوك في كندا فــ طلب من دكتور ابراهيم الفقي انه يجي يديهم كورس .. فــ دكتور ابراهيم قاله الكورس عن "التسويق ولا ادارة الاعمال ولا ولا تنظيم الوقت ..." وقفه وقاله الكورس هيكون عن العلاقات الاسريه الصحيحه .. استغرب في الاول .. بس عرف من صاحب البنك دا انه عامل الكورس دا علشان محتاج يستفاد من الموظف اللي عنده بنسبة 100% من غير اي خساره في تفكيره تضيع علي مشكله ف اي حاجه .. ودا فعلا احنا محتاجينه في حياتنا .. اننا ندور ع حل المشكله من جذورها فعلا مش نقول دا مقصر في شغله يبقي ياخد جزا .. لا هو فكر يحل المشكله الاول :))
لازم تحاول بقدر الامكان انك تفصل مشاكلك عن شغلك .. لان ربط الاتنين ببعض هيسبب كوارث كتير .. تفصلها ازاي بقي ؟ بأنك تبص علي المشاكل من فوق .. تخرج نفسك من قلب الدايره وتبص من فوق وتمشي علي جزء تاني تخلصه وابقي ارجع للجزء بتاع المشاكل تاني بعد الشغل وحلها .. بس متبقاش جوا الدايره :))
5-الركن الاجتماعي :-
قبل ما ندخل ف الكلام .. الاول اسأل نفسك شوية اسئله كده :-
1-انت شايف علاقتك مع الناس كويسه ؟
2-بيحبوا يقعدوا معاك ولا بيزهقوا منك ؟
3-انت بتحب الناس .. اجتماعي ولا انطوائي؟
بتستفيد من الناس اللي حواليك ولا بتقضي وقت والسلام ؟
علاقتك بالناس وحياتك الاجتماعيه كلها تتلخص ف الايه "ولو كنت فظاً غليظ القلب لانفضوا من حولك" "ال عمران"
بالطريقه دي تقدر تكره الناس فيك بشكل غير طبيعي هتلاقي نفور من كل اللي حواليك !
روشتة حب الناس:
1-ساعد الناس من غير مقابل
2-اعط
3-سامح
4-كن بشوشا وابتسم
قال رسول الله صل الله عليه وسلم "تبسمك في وجه اخيك صدقه" غير انه صدقه وليه اجر عند ربنا سبحانه وتعالي .. انت عندك في وشك 80 عضله .. لما بتبتسم بيتحرك منها 14 .. الــ 14 دول متصلين بمراكز في المخ .. والمخ المسؤل عن كل الجسم .. فــ ابتسامتك بتتحكم فيك كلك :))
فن الاتصال بالعلم الخارجي:
دا اهم جزء في الركن الاجتماعي .. اول حاجه لازم تتقبل نفسك .. وتتقبل الناس اللي حواليك ..يعني مثلا بتبان اهمية اتصالك باللي حواليك اوي لما تروح تعمل انترفيو .. لما يلاقوك مش عارف تعبر او تتواصل مع الناس خلاص .. حتي لو المهارات اللي عندك مش عند حد .. خلاص ملكش لازمه لانك مش هتعرف توصل مهاراتك دي لحد ولا تفهمهاله .. ودا مش هيبقي مشكله في الشغل وبس .. لا هتبقي مشكله في حياتك كلها وعلشان المشكله دي تتحل لازم تفهم نفسك :)
نفسك عباره عن 4 شخصيات .. اللي قدامك نفس الاربع شخصيات
1-ودود
2-معبر
3-قيادي
4-محلل
علشان تعرف تتعامل مع اللي حواليك لازم تحدد شخصية اللي قدامك ايه من الاربعه دول .. لازم تشوفها هي ايه واتعامل معاها بنفس الشخصيه عندك :)
6-الركن المهني:-
علشان تشتغل حاجه حتي لو مش حاببها لازم تقنع نفسك انها مجرد خطوه للي انت عايزه .. مش منطقه خلاص هتقف فيها .. لالا هي مجرد خطوه للوصول في الطريق ليس الا .. لو معملتش كده هتلاقي نفسك فشلت في كل حاجه .. ولازم ترضي بكل حاجه .. كل اللي يحصل خليك راضي اوي .. لما ترضي باللي انت فيه هتستمتع بيه ولما تستمتع بيه هتنجزه بسرعه وتعدي ع اللي بعديه اللي انت عايزه :))
خليك انت دايما مراية نفسك .. طالما مقتنع باللي بتعمله ومؤمن بيه .. متخليش كلام الناس يحبطك اياً كان .. خليك دايما ايجابي ومؤمن بفكرتك خلي كلام الناس وقود الوصول للهدف :)
حب ما تعمل حتي تعمل ما تحب
7-الركن المادي :-
انت مرتاح ماديا .. يعني مبسوط من دخلك ..؟
طيب لو الاجابه لا .. انت عملت ايه غير انك قولت لا .. انت عملت ايه علشان تغير دا .. تقريبا كتير مننا لسه في مرحله دراسيه وبياخد مصروف من البيت .. لو دا مش عاجبك .. قولت انا هعمل كل اللي عليا في الدراسه علشان لما اتخرج الاقي شغل بمرتب يعوضني عن كل اللي فات ؟؟ فكرت فيها دي ؟ انت بأيدك تعمل اللي انت عايزه ... حاول ع قد ما تقدر بقي :))
وفي استراتيجيه للفلوس لما تيجي تصرفها .. يعني الناس اللي عايزه تعمل حاجه لما بيكون معاها فلوس بتصرف 10%منها وبتشيل الــ 90% التانيين لاي حاجه تانيه .. مهم جدا انك تحافظ علي تعبك مش تصرفه كله مره واحده :))
